"Bytōm to niy hasiok?"
Chyba cały świat słyszoł już hasło "Bytōm to nie hasiŏk". Niy yno Bytōmiŏki to głoszōm, bo roztōmajte celebryty z całyj Polski tyż powtŏrzajōm ciyngiym te świynte słowa, a telewizyjŏ zrobiyła ô tym nawet program publicystyczny. Gŏdanie, że Bytōm to niy hasiŏk ôd jakigoś czasu je richtig "trendy". A cały tyn auflauf zaczōn sie skuli miyszkańcōw Bobrka, kerym zawŏdzało, że z niylegalnego wysypiska śmieci przi ulicy Pasteura capi jak pierōn. Jŏ niy wiym, eli ône tam chcieli, coby z takigo wysypiska wōniało parfinami, abo co? Zōuwizōu, ôd tyj mary kupa ludzi pochorowała sie na bōle gowy, fiber, morzisko i durfal, skuli czego sztynks bōł yntlich jeszcze gorszy. Zrobiyła sie srogŏ chaja w cołkim mieście, ale niy yno sam, bo z cajtōngōw, interneca i telewizji ô sprawie usłyszała całŏ Polska. Niyskorzij pokŏzało sie, że take niylegalne wysypiska mōmy bezma we wszyjskich dziylnicach Bytōmia, a lastauta prziwożōm sam abfale z roztōmajtych miyjsc w kraju i z