"Nergal"

          Niykerzi gŏdajōm, iże cało swada w polskim społeczyństwie to wina ôd Kaczyńskigo. Niy wierzcie w te cygaństwo, bo tak po prŏwdzie to Polŏkōw potajlowoł Nergal. Kej tyn ôszkliwiec ôsmego marca pokŏzoł wszyjskim ciulika, CBOS zrobiōł ekstra badanie, kere wykŏzało, iże polskŏ nacyjŏ dzieli sie na dwie tajle. Do piyrszyj nŏleżōm ludzie, co sie na Nergala niy gorszōm, a do drugij prawe Polŏki, co sie na tego chachara pogorszyli.

I. Tajla nōmer jedyn skłŏdŏ sie ze trzech grupōw, w kerych sōm:
     1. Ludzie, kerzi ani niy wiedzōm fto to je Nergal,
     2. Ludzie, co Nergala znajōm ale richtig niy majōm anōngu, co tyn pierōn napochoł,
     3. Nojgorszŏ zorta zdrajcōw, kerzi Nergala znajōm i wiedzōm, co nazgobiōł, nale blank im to niy zawŏdzŏ.

II. Drugŏ tajla Polŏkōw fest sie na Nergala gorszy. Ôna tyż dzieli sie na myńsze grupy:

1. Porzōndne Katoliki, kere gorszōm sie na Nergala za black metal, stargano Bibliã i pulŏka na Dziyń Kobiyt,
2. Patrioty, co gorszōm sie na niego za biołego ptŏka, kery je podany na polskigo orła, no i trochã tyż za to, że wpuściōł murzina do finału „The Voice of Poland”,
3. Katolicke Patrioty, kere gorszōm sie na Nergala za wszyjsko.

          Nergal zgorszōł katolikōw po piyrsze diŏbelskōm muzykōm, co jōm grŏ z zespołym Behemoth. Po druge, rŏzczasu stargoł na kōncercie bibliã, skuli czego ubliżōł uczuciōm religijnym tych Polŏkōw, kerzi prawie niy sōm satanistami. A musicie wiedzieć, że yno 43% ludzi w Polsce to satanisty, a 57% to niy-satanisty, tōż widać, że przewŏga tych drugich je ôgrōmnŏ. Przipōminōm wōm, iże satanista to taki czowiek, kery sucho metalu, rocka abo techno, bo te zorty muzyki chwolōm diŏbła. Nergal pedzioł potyn, co ta starganŏ biblia to bōł yno rekwizyt, kery bōł mu przidajny do tworzōnego na binie spektaklu. Krōm tego Pismo Świynte go richtig inspiruje i dlŏ jego kapeli to je fest ważnŏ ksiōnżka. Zōuwizōu katoliki chcieli mu pokŏzać, iże psinco wie ô biblii i zaczli protestować przed kōncertami Behemotha. Yntlich kŏżdy uwidzioł, fto sie na tym richtig znŏ, bo na trzidziści tysiyncy protestujōncych w całyj Polsce aż siedymnŏstu czytało już kejś Pismo Świynte. Siedymnŏstu! A Nergal wiela razy je przeczytoł? Dwa, trzi? Choby szafnoł i piyńć razy to kaj tam jeszcze do siedymnŏstu?!

          A ô co sie rozchodzi z tym pulŏkiym? Ano, na Dziyń Kobiyt Nergal wciepnoł na facebooka filmik ze śpiywkōm, w keryj winszowoł babōm skuli jejich świynta. Na tym filmiku w rynce trzimoł ciulika, ale... niy bōł to jego włŏsny ciulik. Ôpiniotwōrczŏ funkcyjŏ tego tekstu polegŏ miyndzy inkszymi na tym, iże czyńść czytelnikōw przekludzŏ sie prawie terŏzki z grup I.1. i I.2. do grupy I.3 abo dyrekt do drugij, tyj pogorszōnyj tajli społeczyństwa. Jak dociepnã ku tymu informacyjo, że tyn ciulik bōł sztuczny, to trendy sie na chwilã zmiyniōm aż do mōmyntu kej napiszã, iże do pulŏka bōła przilepiōnŏ figurka Chrystusa. I terŏzki to już kŏżdy porzōndny katolik, kery przodzij bōł w grupie I.1. abo I.2 musioł na zicher trefić do grupy II.1. A jak niy, to mŏ grzych.

Afera pulŏkowŏ zaś podzielōła Polŏkōw. Kŏżdyj jednyj tajli niy zdała sie inkszŏ kōnfiguracja elymyntōw skuplowanych we filmie:

a) Nergal + pulŏk,

b) pulŏk + powinszowania na Dziyń Kobiyt,

c) Chrystus + pulŏk,

d) Nergal + śpiywka bez growlu.

          Na ôstatnio trasã kōncertowo Behemotha pod mianym „Rzeczpospolita niewierna” jedyn kamrat ôd Nergala zrychtowoł ekstra grafikã podyjzdrzanie podanŏ na polski herb. Na tyj grafice tyż je bioły ptŏk na czyrwonym tle, yno że ôn na gowie niy mŏ korōny, na krzidłach we plac gwiŏzdek mŏ ludzke czaszki a w pazurach trzimie dwie szlangi. Tym spusobym Nergal ubliżōł uczuciōm patriotycznym Polŏkōw, kerzi go skuli tego podali do gyrichtu. Niystety do heresztu go yntlich niy zawarli, bo pokŏzało sie, że ftoś przepōmnioł zastrzegnōńć biołego drapieżnego ptŏka jako yno polski symbol, a Nergal niy prziznoł sie, że chcioł polske godło sprofanować. Zōuwizōu, patrioty mu niy uwierzyli, bo na szlag widać, że to istny wrōg ôjczyzny. Styknie wejrzeć na jego łachy, porzōnd czŏrne i ta gymbã tako choby zmazano wōnglym abo czymś. A musicie wiedzieć, iże patrioty to sōm te ludzie, co łażōm ôbleczōne yno w „ôdzież patriotyczno”. Beztōż jakbyście tyż chcieli być prawymi patriotami, to musicie sie kupić tako treskã abo jaklã ze napisym „Wielka Polska”, „Żołnierze wyklęci”, abo „Śmierć wrogom ojczyzny” a na nij ôbrŏzkiym ôrła, bioło-czyrwonōm fanōm abo ankrōm PW. A jak wōm żŏl pijyndzy, to niy śmiycie gŏdać, żeście sōm patrioty.

Kej indzij prziszło do dzielyniŏ Polŏkōw skuli murzina we finale „Voice of Poland”. Wtynczŏs Nergal potajlowoł nŏrōd na tych, co:

a) byli tymu radzi,

b) ich to fest znerwowało,

c) gŏdali, co tak po prŏwdzie to ani niy bōł murzin.

          Tōż widzicie, jaki z tego Nergala gizd. Porzōndny czowiek niy miołby sumiyniŏ tak potajlować społeczyństwo. Niy wiym eli te dzielynie pudzie jeszcze kejś cofnōńć, abo w tym kraju już zawdy bydzie yno chaja i ôstuda. Kejby yno taki Nergal chcioł za wszyjsko przeprosić, kupiōłby sie normalne łachy, zaczōn łazić do kościoła i śpiywać śpiywki patriotyczne. Możno wtynczŏs cały tyn miszōng by sie skōńczōł i mielibymy yntlich „Wielko Polskã Katolicko”. Wszyjscy myśleliby jednako i gŏdaliby jednym głosym. Piykne marzynia, pra? A, i jeszcze żŏdyn by już nigdy niy musioł ôglōndać cudzego ciulika. Chyba że po ślubie, od włŏsnego chopa. Nale ta dyspensa tyczyłaby sie yno babōw, pamiyntejcie!