"Gadzina w boju ô władzã"

     Mōm nadziejã, co na przileżytość trwajōncych zmian w zarzōndzie ferajnu "Aktywne Łagiewniki" ludziōm niy bydzie prało na dekel barzij aniżeli przi ôstatnim welōnku do Parlamyntu. Dzisioj ymocyje już ôpadły, ale jeszcze miesiōnc do zadku atmosfera w cołkim kraju bōła pierōnym gorkŏ i nerwowŏ. Niykerzi niy umieli strzimać presy i narobiyli ôkropnych gupot. Dōm wōm przikłŏd. Kŏżdy mōndry czowiek wiy, iże w rezerwatach przirody niy śmiy bele czym futrować gadziny. Za take coś idzie dostać sztrŏfã a niykedy nawet trefić do heresztu. I takŏ niyprzijymnŏ przigoda przitrefiyła sie jednymu chopowi z Brzezin, kery na Żabich Dołach futrowoł aligatory. Niy pōmyśloł, że miynso, kere im dowoł, poradzi tym rzŏdkim w Polsce zwiyrzōm fest zaszkōdzić. A przeca wiedzioł ô swojij kobiycie, że mŏ żōłtŏczkã a ku tymu jeszcze ciynżkõ rojmatykã. Policyjŏ ôbskarżyła go, że zrobiōł to naskwŏl, ale ôn pedzioł, że tak po prŏwdzie ani niy chcioł tych aligatorōw futrować, a jego baba sama cufalym ujechała na ciaplycie i śleciała do stŏwu. Niy chcieli mu wierzić, bo jejich zdaniym żŏdyn niy szpacyruje po Żabich Dołach ze zwiōnzanymi rynkami i nogami. Chop pedzioł, że to yno dowodzi, iże ôn niy cygani. Przeca skuli takich ôbwiōnzanych gyrōw kŏżdy by mōg ujechać na ciaplycie i sie ôbalić, a już na zicher jego kobiyta, kerŏ cołke życie bōła fest zawalatŏ. Dopiyro niyskorzij policyjōny dowiedli, iże we małżyństwie Brzeziniŏkōw ôd dugszego czasu trwoł kōnflikt miyłosno-polityczny. Analiza kōnt na portalach społecznościowych pokŏzała, że umartŏ baba przed śmierciōm udostympniała porzōnd posty Biedrōnia z kōmyntŏrzym "Kocham Roberta". Zaś na kōncie jeji chopa szło nojczyńścij przeczytać "Kocham Jarka" abo "Kocham Mateusza". Tōż jak widzicie chop bydzie mioł problymy i możno niy skōńczy sie yno na sztrŏfie.

     Jeszcze dwadziścia lŏt do zadku żŏdyn by niy pōmyśloł, że na Żabich Dołach bydymy mieć aligatory. Ale globalne ôcieplynie mŏ roztōmajte skutki, gadzinie robi sie corŏz to cieplij i wandruje na pōłnoc. Skirz tego w lasach kole Pszczyny, Tychōw a Bierunia żyjōm terŏzki pumy, ô czym niydŏwno głosiyły wszyjske lokalne mydia, niy wiym po jakiymu take tym faktym udziwiōne. Pumy przijechały do nŏs z Ameryki, bo tam sie terŏzki dużo gŏdŏ ô tym jak to w Polsce warōnki do życiŏ sie poprawiajōm. Takŏ puma może sam pojeść wiela yno chce i to roztōmajtych miyns. Jak zezre sŏrnika na śniŏdanie, to na ôbiŏd może se zaserwować bez przikłŏd dzika. Na wieczerzõ niykedy trefi sie jaki grzibiŏrz, tym barzij że latoś grzibōw bōło ôd pierōna, a te lebry łażōm po lasach blank niyuzbrojyni. Zaś w Ameryce Trump buduje mur, coby mu już żŏdne borŏki z Meksyku niy przełaziyli bez granicã. Niykere Amerykōny sie radujōm, ale pumōm to sie blank niy podobŏ, bo skuli tego majōm ajnfach mynij jŏdła. Skirz tego ymigrujōm do Polski. Jednak Trump niy je taki gupi i niy chce sie tyj cynnyj zorty zwiyrzōw ze swojigo ekosystymu tak leko pozbyć. Beztōż tyż cofnoł niydŏwno ôbowiōnzek wizowy dlŏ Polŏkōw, co zdaniym ekspertōw może hned eksodus pumōw sztopnōńć. Już terŏzki w amerykōńskich lasach masowo sadzōne sōm grziby, coby ściōngnōńć dō nich jak nojwiyncyj Polŏkōw i zwiynkszyć szanse pumōw na skuteczny gōn.

     Możno niy wszyjscy z Wŏs wiedzōm, że do Łŏgewnik tyż przikludziyła sie fest egzotycznŏ zorta gadziny. Dyrekt ze Nowyj Zelandyje przijechały dō nŏs ptŏki, kere sie mianujōm kiwi. Wrŏz z tekstym publikujã unikatowõ fotografijõ, na keryj widzicie ôkŏz tego ptŏka w jego naturalnym strzodowisku, na Amyndach. Dŏwejcie pozōr, bo sōm to ptŏki, co wyglōndajōm trochã choby take ajnfachowe kurzice, ale poradzōm być richtig agresywne. Majōm rube pazury i szpicate dziuby, kerymi poradzōm zranić kŏżdego fto im wlejzie w drogã, niyznŏleżnie ôd jego przekōnań. Mōm nadziejã, że w boju ô władzã w "Aktywnych Łagiewnikach" żŏdyn niy użyje tych ptŏkōw do likwidacyje politycznych wrogōw. A ptŏkami idzie leko manipulować, bo majōm ptŏsie mōzgi i niykedy robiōm rzeczy, kere je ciynżko spokopić. Potwierdzyniym niych bydzie zachowanie pingwinōw, kere po sztyrdziestu latach chcōm wrŏcać do ślōnskigo ZOO. Niy wiym fto im co nagŏdoł i jako siyła politycznŏ je w to zaangażyrowanŏ, ale te gupie ptŏki, kere zaôbycz żyjōm w niskich tymperaturach, przikludzajōm sie do corŏz to cieplyjszyj Polski. Jŏ chyba nigdy niy kapnã polityki. Możecie sie śmiŏć, ale w mojij naiwności marzã, coby doczkać dnia, w kerym żŏdyn niy bydzie już używoł gadziny do swojich politycznych cylōw. I żŏdyn ptŏk, yjzel,, afa ani cielŏk niy bydōm piōnkami w bezsumiynnym szpilu ô władzã.