"Taśmy Kaczyńskigo"

     Gŏdŏ sie, że echt przŏcieli idzie poznać yno w biydzie. Ale jŏ by raczyj pedziała, że ô tym, fto richtig je waszym dobrym kamratym, dowiycie sie dopiyro w szczyńściu. Bo wiynkszość poradzi sie trŏpić waszym niyszczyńściym i pocieszać po szlagach fōndniyntych wōm ôd życiŏ. Nale yno ci nojlepsi umiōm sie szczyrze radować kŏżdym waszym sukcesym. Niydŏwno przewiedzioł sie ô tym prezes Kaczyński, a jednym z tych, kerzi testu na przŏciela niy zdali, bōł prymier polskigo regyrōnku. Ô debiutanckich nagraniach prezesa pod mianym "Taśmy Kaczyńskiego", co miały prawie swoja prymierã, Morawiecki pedzioł: "To jeden z największych niewypałów od czasów II wojny światowej". Chop je ywidyntnie zŏwistny, bo "Taśmy Kaczyńskiego" sōm moc barzij popularne aniżeli jego włŏsny debiut. Styknie wpisać w google jedne a druge miano i zarŏz widać, że to je nokaut. Nagranie prezesa mŏ aże dwadziścia szejś milijōnōw wynikōw, a "Taśmy Morawieckiego" yno trzi milijōny ôziymset dziewiyńdziesiōnt tysiyncy, co tyż niy je mało, nale takōm rōżnicōm idzie sie richtig strŏpić. Nojprzōd żech pomyślała, że możno prymier mŏ recht, możno sie znŏ, bo je ekspertym w tyj dōmynie. Nale wejzdrzałach na ściyżkã jego edukacyje i niy znŏdłach tam nic zwiōnzanego z muzykōm. Niy śmiã pedzieć, że wiy ô tym tela co kot ô kwaśnym mlyku, bo karlus tyż coś tam w przeszłości nagrywoł, ale jego ôpinijõ ô nagraniach prezesa "Miała być bomba, wyszła bańka mydlana, gōra, ktōra urodziła mysz" ciynżko potraktować za merytorycznõ krytykã.

     Zōuwizōu musiałach mieć ô "Taśmach Kaczyńskiego" włŏsne zdanie, beztōż posuchałach nagraniŏ i muszã szczyrze pedzieć, iże niy bōło leko. Niy wiym co to za zorta graniŏ, bo terŏźnŏ muzyka poważnŏ to niy moja dōmyna, nale trochã żech posznupała i zdŏwŏ mi sie, co to bydzie kajś miyndzy prymitywizmym a muzykōm kōnkretnōm, możno tyż bruityzmym, bo idzie tam znojś elymynta kŏżdego z tych kerunkōw. A strōna tekstowŏ? Chciałabych pedzieć, że chytŏ za serce, abo choć aby je ciekawŏ, ale tak po prŏwdzie to te fandzolynie wartko mi sie zmierzło. Je tam pŏru wokalistōw, kŏżdy mŏ swōj kōncek tekstu i niystety żŏdyn ś nich niy mŏ za dobrego głosu. Ciynżko pedzieć co autor richtig mioł na myśli, nale gyneralnie rozchodzi sie ô pijōndze, roztōmajte machlojstwa i gyrichty. Taki trochã gangsta rap ale robiōny ôd biołych ksztołcōnych ludzi, beztōż je blank arytmiczny no i fest ugrzeczniōny, bo żŏdyn tam nic niy pierōni.

     W świecie showbusinessu niystety mało je przipadkōw, kej jedyn artysta prōmuje i je podporōm dlŏ drugigo. Wiyncyj tam zŏwiści i wzajymnyj rywalizacyje, a jak sie jedyn na drugigo ôbrazi to poradzōm sie na siebie nawet duge lata gorszyć. A prziczyny sōm roztōmajte, bo abo jedyn ôbgŏdŏ drugigo we wywiadzie, abo mu libstã ôdbije, abo mu porwie pomysł na śpiywkã, abo go niy zaprosi do spōłpracy chociŏż przŏdzij zawdy wszyjsko robiyli społym. No i chyba tukej bych widziała powōd swady miyndzy prezesym a prymierym. Dyć kamracōm sie ôd lŏt i społym reskyrujōm tym krajym. Mogłoby sie zdŏwać, że przi takim ważnym nagraniu debiutant bydzie chcioł, coby mu tyn barzij ôbeznany pōmogoł. I prymier rŏd by to zrobiōł, ale niystety żŏdyn go ô to niy poprosiōł. Beztōż sie ździybko znerwowoł i pedzioł w mediach pŏrã niyprzijymnych słōw. Bydymy widzieć jako to sie wszyjsko skōńczy. Mōm nadziejã, że niy tak jak wtynczŏs kej Paulek Knop znany tyż jako "Banksy z Lipin" rŏzczasu fest ubliżōł swojimu artystycznymu partnyrowi Achimowi Soblowi. Na Achima niykerzi recynzynci dzieł kōnsztu gŏdali "Chropŏcowski Warhol", bo chop niy yno malowoł, ale tyż kōmpōnowoł muzykã (groł na grzebiyniu) i filmowoł śluby, a niykedy nawet noce poślubne. Karlusy dycki łaziyli społym po mieście i malowali na ścianach familokōw take srogie pulŏki. Knop kryślōł ôbrys całego ciulika, a Sobel zajmowoł sie ôrnamyntami, tōż bez przikłŏd wosy na miechu, ajchla a inksze detajle to bōła jego robota. Jedyn jedyny rŏz Paulek ugŏdoł sie na sesyjõ malyrskõ z inkszym kamratym, a Achim niy umioł mu tyj wyzdrady wybŏczyć. Beztōż wtynczŏs zazwōniōł na policyjõ i pedzioł, że wandalym co kryklŏ po wszyjskich świyntochłowickich stawiyniach je Paulek Knop. Niystety w gyrichtach niykere zŏrty kōnsztu sōm ofyn dyskryminowane, skirz tego Banksy z Lipin musioł przesiedzieć dwa dni w hereszcie, a potyn kŏzali mu wypucować wszyjske pulŏki w mieście. Ôd tego czasu Knop niy chce widzieć Sobla na ôczy i blank sie tymu niy dziwujã.

     Rŏz za kedy z takij chaje miyndzy artystami rodzi sie tyż cosik richtig dobrego. Bo kejby, bez przikłŏd, w 1983 roku niy bōło swady w Metallice, a Hetfield z Ulrichym niy wyciepli Dave'a Mustaine'a z kapeli, to dzisioj niy mielibymy Megadeth. I żŏdyn z nŏs nigdy niy usłyszołby takich gynialnych albumōw jak "Rust in Peace" abo "Countdown to Extinction". Z tego nauka dlŏ prymiera prostŏ i klarownŏ. Dej prezesowi pokōj. Niy jamruj i niy wajej, yno bier sie do roboty i nagrej cosik lepszego. Możno szafniesz jaki majstersztik, ô kerym bydōm ôsprawiać wszyjscy, a na googlach pokŏże sie trzidziści, piyńdziesiōnt abo nawet sto milijōnōw wynikōw. Jak to gŏdajōm: "Sky is the limit!"