"Chaja skuli Owsiaka"

Fot.: Ania Katroshi Fotografia

          Zaś sie te dziynnikŏrze ciepiōm, a terŏzki to już ale richtig niy ma ô co. Piszōm, co jedyn farŏrz w Tychach kŏzoł ministrantōm przegōnić sprzed kościoła wolōntariuszy ôd Owsiaka. Te sie niy dali i zrobiyła sie małŏ chaja, zakōńczōnŏ dopiyro interwyncjōm ôd policyje. A skuli czego ksiōndz niy chcioł, coby mu te bajtle betlowali wele kościoła? Po jakiymu niykere katoliki niy sōm radzi Wielkij Ôrkiestrze Świōntecznyj Pōmocy? Znŏdłach w internecu artikel, w kerym jakiś fest ksztołcōny ksiynżŏszek piyknie nōm to ekleruje. Niy wszyjsko żech kapła, nale jak bydziecie mieli moje lata, to tyż wōm sie może trochã motlać w gowie. Modym tyż sie niyrŏz motlŏ, a niykere ksztołcōne ludzie ôd tego utramyntnego uczyniŏ poradzōm nawet dostać do gowy. W Łŏgewnikach na Pyjterwizie miyszkoł kejś profesor Morcinek, kery mioł dōma gynau szejśset szejśdziesiōnt szejś roztōmajtych ksiōnżek naukowych. Uzdoł sie, co kŏżdo jedna musi znać na spamiyńć i chociŏż nojprzōd richtig dobrze mu szło, to yntlich musioł za to zapłacić srogo cynã. Ludzkŏ gowa mŏ ôgraniczōno pojymność, beztōż kŏżdŏ nŏstympnŏ spamiyntanŏ ksiōnżka zebiyrała plac barzij ajnfachowyj wiedzy. Nojsōmprzōd przepōmnioł jak sie gŏdŏ po naszymu i trochã sie ludzie nerwowali jak z kŏżdym chcioł yno po polsku ôsprawiać. Nale jak niyskorzij niy pamiyntoł już, że czowiek niy śmiy w samych badkach wyłazić z chałpy do sklepu, to kŏżdy już wiedzioł, że starymu Morcinkowi piere na dekel. Potyn było jeszcze gorzij, bo przepōminoł już jeść, pić i łazić do haźla. Jak go wziynli do lazarytu, to tam przi nŏstympnyj ksiōnżce przepōmnioł yntlich ô dychaniu i umar z wynikym trzinŏstu spamiyntanych ksiōnżek.

          Nale jŏ niy ô tym miała pisać yno ô Wielkij Ôrkiestrze, kerŏ podug tego ksiyndza je ôświecyniowōm filantropijōm co niy mŏ moc spōlnego z chrześcijōństwym. Filantrop mŏ rŏd cołko ludzkość jako zbiorowość, a we chrześcijōństwie fōnguje pojyńcie miyłowaniŏ bliźniego, kere mŏ naturã ôsobowo. Wiym, że ciynżko to spokopić, nale idzie to wytuplikować na przikładzie Franca, kery wygroł rŏzczasu w totolotka tysiōnc dwiesta złotych i poszoł do szynku „U Richata“. Bōł fest rŏd z tyj wygranyj, beztōż ryknoł na cały karpyntel, że wszyjskim fōnduje piwo. Franc je yno filantropym, bo kejby bōł echt chrześcijaninym to brołby po jednym piwie i sōm zanosiōł kŏżdymu karlusowi co prawie w tym szynku bōł. Możno by wtynczŏs mynij udoł, bo byli tyż take miglance, co w raji po te jedne fōndniynte piwo poradziyli trzi razy stŏć.

      Podug ksiynżŏszka Owsiak niy je ani trochã barzij szporobliwy aniżeli Franc, bo sebrane pijōndze udaje fest niyrozwŏżnie na reklamã, włŏsne geltagi, ôrganizacyjo kōncertōw w dziyń finału a przede wszyjskim festiwal, kery sie mianuje Przistanek Woodstock. A tyn Woodstock to je dopiyro jedna srogŏ ôstuda. Ludzie tam pijōm gorzołã, bierōm narkotiki i tańcujōm po sagu w ciaplycie przi muzyce rockowyj, a krōm tego dupczōm sie kŏżdy z kŏżdym jak nojyńci. Beztōż niykere ksiyndze i klŏsztorne panny, kere tam byli, wyjyżdzali fōrt zmachane gorzij aniżeli hajer po szychcie. Dyć niy kŏżdy poradzi tak fest dugo fajrować i blank sie niy dziwuja tyj klŏsztornyj pannie co swoje spōmniynia z Woodstocka zamianowała „Widziałyśmy przedsionek piekła“.

          Owsiak mŏ tyż niybezpiecznych kamratōw ze sekty, kerŏ sie mianuje Hare Kryszna. Nojgorsze w tych gizdach zdŏ sie być to, że ône niy jedzōm miynsa. Powiydzcie yno, kery zŏcny chop, co mŏ normalno, ciynżko robotã, niy lubi sie pojyść miynsa? Wejrzijcie sie na polskich katolickich biskupōw eli keryś wōm wyglōndŏ na wegetariana. Ôd jarzyn na zicher by sie tak niy spaśli, pra? Na szlag widać, że sie karlusy narobiōm, a te chuderlŏki ze Hare Kryszny to sōm pewnikiym same elwry i lesery.

         Ksiōndz pisze tyż, co podyjzdrzane kamraty i ôszkliwe poglōndy niy zawŏdzajōm Owsiakowi dostać ôd telewizyje kupã czasu antynowego na przileżytość finału Ôrkiestry. Cołki dziyń pokazuje sie wtynczŏs kōncerty, festy i betlowanie, do kerego bezmaś czynsto te dziecka sōm przimuszane. Owsiak zawiyrŏ szkoły i przedszkola i kŏże bajtlōm łazić z biksōm po ulicach i szterować ludzi. A nojczyńścij chce, coby stŏli wele kościołōw i drŏźnili tych katolikōw, kerzi niy sōm radzi Wielkij Ôrkiestrze Świōntecznyj Pōmocy. No i tela mynij wiyncyj idzie przeczytać w tym artiklu. Terŏzki widzicie, po jakiymu farŏrz w Tychach niy chcioł, coby mu wolōntariusze stoli pod kościołym. Na zicher czytoł tyn artikel i żŏl mu sie zrobiōło przimuszanych do betlowaniŏ borŏkōw. A kej ftoś za dużo czytŏ, to mu sie zaczynŏ w gowie motlać choby naszymu profesorowi Morcinkowi. Dyć kŏżdŏ gowa mŏ ôgraniczōno pojymność, ôd ksiyndza tyż.