"Placowe chaje"

          Z kŏżdyj chaje idzie erbnōńć jakoś życiowo naukã. Niykere ludzie poradzōm to wartko spokopić, a inksze bydōm dugie lata durś sie ô to samo wadzić. Jŏ na szczyńście nŏleżã do tyj piyrszyj grupy, beztōż po tym auflaufie skuli placu Szewczyka w Katowicach (kery przemianowali na Marii i Lecha Kaczyńskich) pedziałach, że u nŏs niy pozwolã na tako ôstudã. Nasz plac na Fytlu niy mŏ żŏdnego miana, nale wojewoda Wieczorek jeszcze sie niy kapnoł. Muszã działać gibko, zaczym tyn gizd niy wciśnie nōm za patrōna jakigo gorola, kery w życiu ô Fytlu ani niy słyszoł.

          W grã wchodzi pŏru naszych lokalnych bohatyrōw, bez przikłŏd Wtorcynŏ, ô keryj idzie pedzieć, że je świyntŏ kobiyta. Problym może być z jeji chopym, kery rŏzczasu zapisoł sie do PZPR. Tak po prŏwdzie to bōł wtynczŏs naprany i jeszcze w tyn sōm dziyń straciōł legitkã, nale te lebry z IPNu poradzōm jōm na zicher znŏjść w jakim starym szranku. Wojewoda powołŏ sie na ustawã dekōmunizacyjno i szlag trefi nasz plac Aneli Wtorek.

          Artysty ani pisŏrza, kery by mioł jakiś zwiōnzek z Fytlym niy umiã sie terŏzki spōmnieć. Nojbliżyj do pisŏrza bydzie chyba Erichowi, kery po prŏwdzie je inżynierym technologiym, nale rŏzczasu zapisoł cały szejśdziesiyńcioszkartkowy heft swojymi idyjami. Niykere z nich pokŏzały sie niyszkorzij fest przidajne dlŏ naszego miasta i choć aby skuli tego zdŏ sie tyn plac mianować jego nazwiskiym.

          Mōmy jeszcze Hajnela, kery zbajstlowoł banki i klopsztangã na Fytlu abo Gryjtã, kerŏ rŏzczasu wyretowała swojigo ôżartego chopa i jego dwiōch kamratōw jak sie topiyli w Amyndach. Mieli my tyż jednego znanego fuzbalera, nale ôn nigdy niy groł w Ruchu, beztōż niy wiym, eli werci sie ô nim gŏdać.

          Kandydatōw mōmy za tela i bez czas kōnzultacji społecznych bydymy welować za nojlepszōm ôpcjōm. Zōuwizōu, kŏżdŏ śnich mŏ na zicher wiyncyj spōlnego z Fytlym aniżeli Kaczyńskie ze Ślōnskiym. Jak sie uwinymy, to Katowice i inksze miasta bydōm sie mogły ôd nŏs uczyć. A wojewoda Wieczorek niych nōm skoczy na pukel.