"Szlus ze śpiywaniym"

Fot.: Ania Katroshi Fotografia

          Bierōm sie już za śpiywŏkōw i roztōmajtych muzykantōw. Zaczynajōm ôd blackmetalowcōw, kerzi majōm nojwiyncyj grzychōw na sumiyniu. Kejby fto niy wiedzioł ô kogo sie rozchodzi, to sōm te karlusy, co sie tak żadnie farbiōm gymby na czŏrno i bioło, skuli czego wyglōndajōm choby jakie diŏbły. Ôkultyzm, kery je wszeôbecny w jejich tekstach sprŏwiŏ, iże Lucyper mŏ do nich leki dostymp.

          Kej black metal bydzie zdelegalizowany, to potyn już pōdzie gibko: heavy metal, thrash metal, death metal, speed metal, power metal i kŏżdy inkszy metal. Yntlich żŏdyn sie niy uchowie. Zawrzōm tyż wszyjskie hōty, a ulicã Metalowcōw w Chorzowie przemianujōm. Za to sie weźnie sōm wojewoda ślōnski, beztōż wartko idzie zmiarkować, jako sie bydzie ta ulica po nowymu mianować.

          Nale to jeszcze niy wszyjsko. Ustawa desatanizacyjnŏ bydzie miała fest szyroki zasiyng. Muzyka techno, kerŏ je tworzōnŏ ôd satanistōw, wkludzŏ ludzi w trans i wtynczŏs diŏbły poradzōm przejōńć nad niymi kōntrolã. Skirz tego ôna na zicher bydzie nastympnŏ. Potyn przidzie dran na rock, pop i inksze bezbożne zorty muzyki.

           Jak wōm sie zdŏwŏ, co naszym ślōnskim śpiywkōm dajōm pokōj, to żeście sie fest chachli. Ani niy mŏcie pojyńciŏ, wiela tak po prŏwdzie mōmy spōlnego z black metalym. Styknie wejrzeć na grubiŏrza po szychcie i jego gymbã cŏrno choby u diŏbła. W Norwegii, w keryj majōm nojwiyncyj kapel blackmetalowych, bōł taki jedyn ipta ô nazwisku Vikernes. Tyn gupielŏk groł w jednyj z takich kapel, a po czasie rŏd chodziōł wszyndy ze sztracheclami i przitrefiyło mu sie niymi podpŏlić trzi kościoły. Potyn zamordowoł inkszego blackmetalowca, z kerym sie fest powadziōł ô to, kery ś nich je gorszym gizdym i lepij chwŏli diŏbła. Yntlich na szczyńście zawarli go do heresztu.
            Co to mŏ spōlnego ze ślōnskimi śpiywkami? Ano, na Piaśnikach miyszkoł kejś Erwin Chachuła, kery groł i śpiywoł ślōnskie śpiywki ludowe w jednyj takij wywołanyj kapeli. I musicie wiedzieć, że tyn Erwin po robocie tyż rŏd sie bawiōł sztracheclami. Rŏzczasu nawiedziōł swojigo kamrata Mariana w jego ôgrōdku na Lipinach kaj po dwiōch halbach prziszło miyndzy niymi do chaje. Powadziyli sie ô to, ôd kogo baba robi lepsze rolady. Marian tak dugo sie śmioł z Chachułowyj, kerŏ dŏwŏ do roladōw grziby, że Erwin yntlich niy strzimoł i sproł gospodŏrza ôkropicznie. Potyn zaczōn gymzić po sōmsiednich ôgrōdkach i zdōnżōł hajcnōńć trzi lauby podwiela niy przijechała policyjŏ. Chachuły zawarli do heresztu i ôbskarżyli go miyndzy inkszymi ô ôrganizacyjo czŏrnyj msze satanistycznyj, bo w jednyj z laubōw znŏdli spŏlōnego kota i pantograf, kery bezmaś je symbolym ôkultystycznym. Niy wiym po jakymu, dyć kŏżdŏ bana mŏ na dachu take pierōństwo i żŏdyn sie ô to nigdy niy ciepie.

            Tuplikowanie, że jedyn waryjŏt niy może dyskwalifikować cołkij zorty muzyki to je darymny futer. Kŏżdy słyszy ô czym śpiywōmy i tego sie niy idzie wyrzeknōńć. Styknie posuchać "Poszła Karolinka do Gogolina", coby wiedzieć, że w tych śpiywkach sōm prōmowane naganne postawy społeczne. Karolinka jako prototyp feministki co niy godzi sie na tradycyjno rolã kobiyty w społeczyństwie, idzie fōrt ôd chopa kery jij przaje i ôbiyrŏ "kulturã singli". Dzisioj takŏ Karolinka na zicher ôblykła by sie na czŏrno i z czŏrnym (blackmetalowym) paryzolym pocisłaby dyrekt na czŏrny protest.

          Tōż widzicie, że zmiany legislacyjne sōm niy do unikniyńciŏ. Przinojmnij żŏdyn już niy bydzie grzysznōm muzykōm chwolōł diŏbła. Nale niych sie żŏdyn niy trŏpi, bo durś bydzie szło legalnie pośpiywać. Rekrutacyjŏ do chōrōw kościelnych już sie napoczła, yno trza sie uwinōńć bo dlŏ wszyjskich placu na zicher niy styknie.