"Kler"

     Niy wiym eli ta swada w kościele niy skōńczy sie jakom schizmōm abo inkszym pierōństwym. Fest uwŏżany krakowski ksiōndz Isakowicz-Zaleski gorszy sie na Ministra Kultury i Dziedzictwa Narodowego skuli tego, iże chop z publicznyj kasy finansowoł kler. Dyć dŏwanie pijyndzy na kler to polskŏ tradycyjŏ, ważny elymynt polskij kultury i narodowyj erbizny. Fto to widzioł na mszy w niydzielã niy wciepnōńć nic na tablet abo farŏrzowi niy wrynczyć kuwerty na kolyndzie? Ksiōndz sztrŏfowoł jednego ministra, nale idzie zmiarkować, co rozchodzi mu sie o politykã cołkigo polskigo regyrōnku, kery ciyngiym tyn kler finansuje. Po swojij strōnie Isakowicz-Zaleski mŏ już srogo grupã zwolynnikōw a pōmagerōw. Katolickiymu Stowarzyszyniu Dziynnikarzy tyż sie wyciepŏwanie państwowyj kasy niy widzi, beztōż apeluje, coby ludzie bojkotowali kler, kery te pijōndze ôd ministra erbnoł. Dugo niy zetrwało, kej władze niykerych miast uzdały, co na jejich terynie żŏdyn finansowanego z państwowyj kasy kleru ani niy uwidzi. Niy wiym, eli wszyjskich ksiynżoszkōw stamtōnd na szlag wyciepnōm, abo bydōm kludzić podszukōnek, coby sprŏwdzić, fto richtig te publiczne pijōndze broł. Na razie rozchodzi sie ô take miasta jak Ostrołęka, Grodzisk Mazowiecki i Gostynin, nale to może być dopiyro wiyrch gōry lodowyj. Z drugij strōny sōm miasta, w kerych ludziōm finansowanie kleru nic a nic niy zawŏdzŏ i radzi go u siebie widzōm. Szłoby pedzieć, iże kler podzielōł Polŏkōw na dwie zorty. Jedna gŏdŏ, co kleru niy chce widzieć na ôczy i nojlepij, coby żŏdyn go w tym kraju już wiyncyj niy ôglōndoł. Drugŏ zorta zaś naskwŏl padŏ, co z chyńciōm sie na tyn kler jeszcze z włŏsnyj kapsy dociepnie.

     Tōż na ta chwilã ciynżko pedzieć, jakŏ srogŏ bydzie ta rebelyjŏ i jake sōm szanse, iże hned dōńdzie do rozłamu w kościele katolickim. Kŏżdŏ instytucyjŏ musi rŏz za kedy strzimać jako ciynżko prōbã. Prziznōm sie wōm, co za modych lŏt taki rozłam ô małowiela niy przitrefiōł sie w mojim małżyństwie, i to tyż skuli pijyndzy. Gerat, wtynczŏs nojlepszy kamrat ôd mojigo Jorga, nic yno ciyngiym potrzebowoł dofinansowaniŏ. Kej szli społym do szynku, to za piwo zawdy bulōł mōj chop. Jak Gerat kupowoł moplik, telewizor abo nowy ancug, to życzoł ôd Jorga, bo prawie swojich pijyndzy niy mioł za tela. Jak szoł na zŏlyty, to kwiŏtki targoł w naszym ôgrōdku, w swojij chałpie hajcowoł wōnglym przismyczōnym z naszyj pywnicy, a niyrŏz tyż prziszoł sie do nŏs pojeść, bo jego kilszrank bōł bezma prōzny. Chciałach te finansowanie yntlich sztopnōńć, nale Jorg nic yno brōniōł swojigo kamrata, beztōż fest my sie ô to powadziyli. Pierōn wiy, eli by sie to niy skōńczōło szajdōngiym, kejby my rŏzczasu niy pojechali z familijōm nad morze, a Gerat bez tyn czŏs niy sprzedoł całyj mojij biżuteryje do lyjamtu. Wtynczŏs Jorg przeszoł na moja strōna, a Geratowi na pamiōntkã ôstawiōł yno zŏlã pod ôkiym.

     Isakowicz-Zaleski, ô kerym idzie chyba pedzieć, co je liderym tyj nowyj frakcyje, mŏ w kościele fest mocnego rywala. Ôjciec Rydzyk, bo ô nim gŏdka, mŏ tradycyjo barzij w zŏcy i zawdy te państwowe pijōndze rŏd biere. I chyba dziynki takim charyzmatycznym perzōnōm jak ôn, to ôrtodoksy bydōm mieć w tyj rywalizacyji wiyncyj szans. Dyć Rydzyk to niy ańfachowy Gerat, kery wōm bele co z chałpy wyniesie. Ôn bele czego ôd Wŏs ani niy weźnie. Wōnglŏ niy potrzebuje, bo w dōma mŏ energijo geotermalno. Na moplik ani na telewizor niy bydzie życzoł, bo jeździ srogim autym i mŏ swoja włŏsno telewizjã. A kwiŏtki to mu ludzie same prziniesōm i niy musi targać w cudzym ôgrōdku. Tōż kej se tak myślã, jak ludzie w tym kraju przajōm tradycyji, to mogã za tego krakowskigo ksiyndza burziciela yno rzykać. Możno Pōnbōcek mu ta rebelyjo ôdpuści, bo prawe polskie katoliki to już chyba raczyj niy.