"Niy bydź ślimŏk!"

Fot.: Gerhard Gellinger

     Prziznōm sie wōm, że mōj nojstarszy synek to bōł taki przichlast, maminsynek no i tak po prŏwdzie ôkropnŏ klipa. Jak szoł piyrszy rŏz do szkoły to żech mu pedziała, co przi inkszych bajtlach niy śmiy być takim ślimŏkiym, bo durś sie bydōm ś niygo śmiŏć. Nale ôn niy poradziōł inakszyj, beztōż niy mioł w szkole leko. Zōuwizōu, niych bydzie rŏd, że mŏ to już dŏwno za sobōm, bo dzisioj mogliby go z tyj szkoły nawet wyciepnōńć. Terŏzki ślimŏki w szkole to tymat fest drażliwy i lepij ô nich ani niy gŏdać. Rozchodzi sie ô to, że te maźglate bestyje sōm ôdpedzialne za szerzynie ideologije gender. Niy wierzicie? To spytejcie sie w Kuratorium Ôświaty, kere kŏzało dyrektorce SP13 w Olsztynie cofnōńć ze szkolnyj bibliotyki ksiōńżkã "Kim jest ślimak Sam". Bohaterym tyj bojki je mody ślimŏk, kery niy wiy eli po prŏwdzie to ôn je synkiym abo dziołszkōm. Ślimŏki z natury sōm ôbojnakami, ale Sam gańbi sie tego przi bajtlach z klasy, a ônym tyż ciyńżko je ta jego inkszość zaakceptować. Szkolnŏ psycholożka chce, coby Sam zrychtowoł/ała reportaż ô życiu niykerych zwierzōnt, kere miyszkajōm w ôkolicy. Ślimŏk nawiydzŏ swojich sōmsiadōw: familijõ poliandrycznych af (samice majōm pŏru partnerōw), rybã wargacza, kerŏ zmiyniyła płeć, małżyństwo dwiōch chopōw boczōniōw i dwiōch samic wiywiōrek, kere społym chowiōm dziycio. Ślimŏk Sam, ale tyż modzi czytŏcze dowiadujōm sie, że w przirodzie wystympujōm roztōmajte modele familije, tożsamości a ôriyntacyje płciowe. I żŏdnŏ ś nich niy je gorszŏ ani lepszŏ, bo take sprawy niy śmiōm być przedmiotym niczyjij ôcyny. Tak prawiōm autory ksiōnżki, nale pokŏzało sie, co ôlsztyński kurator ôświaty mŏ na tyn tymat trochã inksze poglōndy. Kŏzoł bojkã wyciepnōńć, a na szkołã nasłoł ôd tego czasu już dziesiyńć kōntroli.

     Tōż, jak widzicie szkoła to niy je plac dlŏ ôbojnakōw. Na jejich miyjscu niy pokazowałabych sie tyż na stadiōnie Lechii Gdańsk, kaj na ôstatnim szpilu z Wisłōm Płock wisioł taki srogi transparynt, na kerym stoło napisane: "SODOMICI, PEDAŁY I PEDOFILE Z LGBTI, ŁAPY PRECZ OD NASZYCH DZIECI!" Kejby ftoś niy wiedzioł to litera "I" w skrōcie LGBTI ôznaczŏ INTERSEX, co znaczy ôbojnaki. Autory tyj manifestacyje majōm recht, że piyntnujōm pedofilōw, a jak wszeôbecnie wiadōmo, nojgorsze pedofile nŏleżōm do LGBTI. W inkszych społecznościach i instytucyjach, bez przikłŏd w Kościele Katolickim, to je blank inkszŏ, lepszŏ zorta pedofilōw. Ś niymi taki kibol Lechii na zicher poradzi sie dogŏdać. Miarkujã sie jako to mynij wiyncyj musi wyglōndać:

"-Co ksiądz robi z moją córką?! Ksiądz jest pedofilem!
- Ale...ja nie należę do społeczności LGBTI. Jestem normalnym, uczciwym pedofilem heteroseksualnym.
- Aha. No to...w porządku. Nie przeszkadzajcie sobie."

     Nale prawie tak sie skłŏdŏ, że pedofilijŏ je w tym kraju durś niylegalnŏ i niykerzi chcōm coby taki ksiynżoszek dostoł za swōj czyn nŏleżnõ kŏrã. A tak po prŏwdzie ôn niy je niczymu winowaty. Piyknie wytuplikowoł nōm to arcybiskup Gądecki na ôstatnij Kōnferencyji Episkopatu Polski, kerŏ sie tyczyła pedofilije w Kościele Katolickim. Terŏzki już wiymy, iże to je wina internetu, pornografije i "programōw seksualizacyje dziecek", w kerych sie rozchodzi ô to, coby sprzedŏwać jak nojwiyncyj strzodkōw antykōncepcyjnych. Zaś arcybiskup Jędraszewski ôgłosiōł, że ksiōndz pedofil zasuguje na miyłosierdzie, a kej ftoś gŏdŏ, że mōmy mieć do niego "zero tolerancyje" to używŏ jynzyka nazistōw i bolszewikōw. Na co zasugujōm ôfiary? Ô tym biskupy woleli za dużo niy gŏdać bo musieliby potympić tych małych diŏbłōw, co nic yno durś kuszōm bogobojnych kapelōnkōw i skludzajōm ich na złõ drogã.

     A ô co sie rozchodzi z tōm seksualizacyjōm? Tak po prŏwdzie rozchodzi sie ô edukacyjõ seksualnõ, ale niykerym sie ajnfach pōmiyszały słowa. Take coś kŏżdymu sie może przitrefić, nojczyńścij jak ftoś coś niywyraźnie powiy a tyn drugi źle usłyszy. Tak bōło i u nŏs w dōma kej mōj Jorguś wrŏcoł ze szychty zmachany, ale tyż taki trochã bamōntny, bo w robocie mioł dycki ôkropne larmo. Jŏ sie go wtynczŏs pytała "Dać ci zupy?" a ôn czynsto słyszoł cosik blank inkszego. No i zawdy chcioł. Niykere kamratki mi gŏdały, że ôn tak naskwŏl robiōł, słyszoł to co chcioł słyszeć. Ale jŏ mojigo chopa ô złe intyncyje absolutnie niy podyjzdrzywała. Tych co słyszōm "seksualizacyjŏ" zamiast "edukacyjŏ seksualnŏ" tyż niy śmiymy podyjzdrzywać o złe intyncyje. Ône już majōm takõ chrōnicznõ doległość dakli, kerŏ sie ôbjawiŏ bez przikłŏd tym, że zawdy kej je gŏdka ô "tolerancyji" to im sie zdŏwŏ, że sie gŏdŏ ô "hōmopropagandzie". Niystety ta niymoc je fest ciynżko wylyczyć.

     Inkszym sie te sformułowania miyszajōm niy skuli problymōw zdrowotnych, ale skirz tego, że za bajtla na szkołã to yno bergami ciepali. Beztōż ônym zaôbycz je egal, eli słyszōm "seksualizacyjŏ" abo "edukacyjŏ", bo ôba pojyńcia sōm do nich jednako ôszkliwe. Za bajtla już na piyrszych lekcyjach, kej musieli sie uczyć alfabety, mieli na ta szkołã fest nerwy. Nojbarzij szterowały ich literki "L", "G", "B", "T" a niykerzi niy poradziyli do porzōndku nawet "I" napisać. A już niy ma co gŏdać ô "Q" i "A", bo to już bōł "level extreme". I na zicher dali by sie z tōm całōm edukacyjōm zarŏz pokōj, kejby niy świadōmość, że w prziszłości stadiōnowe transparynty same sie niy napiszōm.

     Pŏrã lekcyji edukacyje seksualnyj majōm już za sobōm rechtory i wszyjske zwierzōntka ze szkoły ślimŏka Sama. We jejich świecie kŏżdy już spokopiōł, co żŏdyn niy śmiy być ôbśmiywany i dyskryminowany skuli swojij seksualności. Wszyjscy tam poradziyli zaakceptować fakt, że niykerzi chcōm żyć inakszyj aniżeli wiynkszość. I uwierzili, że skuli tego naprŏwdy niy sōm ôd tyj wiynkszości gorsi. Gupiŏ ta gadzina, nale musicie pamiyntać, że to je yno prymitywny świat zwierzōnt. Polskie społeczyństwo pod wzglyndym cywilizacyjnym i kulturowym to je cołkiym inkszŏ liga, pra?