"Psy ôd Sławoja"


     Nasz sōmsiŏd Sławoj ze trzecigo sztoku to niy taki ańfachowy Fytlŏk, yno czowiek zŏcny, ksztołcōny i na wysokim stanowisku. Robi we forsztandzie spōłdzielnie mieszkaniowyj, kerŏ zarzōndzŏ naszymi familŏkami. Kŏżdy tukej je tymu rŏd, bo chop wszyjskich nŏs richtig spōmŏgŏ. Bez przikłŏd sprawiōł już, że ściany w naszyj siyni sōm elegancko posztrajchowane, na razie yno na jego sztoku, ale możno kaj indzij tyż sie doczkōmy. Możno tyż yntlich wszyndy zrobiōm take zdobiōne futrziny, złote klōmki i gelyndry (złote, a skrōmne!) choby u Sławoja na trzecim sztoku. Sławoj rŏd pōmŏgŏ tyż w inkszych sprawach, bez przikłŏd jak ftoś chce zapłacić płat za pōmiyszkanie. Wtynczŏs niy musi nikaj łazić ani jechać yno dŏwŏ pijōndze Sławojowi, kery ôsobiście przekazuje je do kasy spōłdzielnie.

     Kedy Cila, baba ôd Hajnela, pedziała wszyjskim, iże pies ôd Sławoja nasroł jij na trit to żŏdyn niy chcioł uwierzić. Kŏżdy miarkowoł, że kobiyta tak fulŏ z pōmsty, bo spōłdzielnia niy chciała jij wymiynić ôkiyn. Kej poszła z chajōm do Sławoja to ôn ani niy chcioł ś niōm gŏdać, ale trzi dni niyskorzij sprzedoł psa jakimś ludziōm z Chropŏcowa. Kupiōł sie drugigo psa, ale kej Wtorcynŏ znŏdła copã na swojim tricie, pies trefiōł do nowych właścicieli na Szōmbiyrkach. Terŏzki Sławoj mŏ nowego psa, rasowego, kery wygrywŏ medale na roztōmajtych ausztelungach, a ludzie bulōm pijōndze coby pokrōł jejich suki. Kŏżdy u nŏs na Fytlu podziwiŏ tego psa, bo takigo majstra my sam jeszcze nigdy niy mieli. I to w żŏdnyj dōmynie.

     Ale baba ôd Hajnela je fest uwziyntŏ. Kupiyła Hajnelowi smartfona i kŏzała mu cichtować na siyni i kryńcić filmy kŏżdy rŏz kej yno Sławoj wypuszczŏ psa z chałpy. Pŏrã dni nazŏd zmōntowany do kupy dokumynt mioł prymierã na youtube. Widać na nim miyndzy inkszymi jak pies srŏ na trit ôd Hajnela, a Sławoj biere tyn trit i zamiyniŏ z tritym ôd inkszego sōmsiada. Widać tyż jak pies wali copã na trit ôd Wtorcyny, a Sławoj ôbrŏcŏ go na ôpach i deptŏ. Film ôbejzdrzeli już bezma wszyjscy na Fytlu, a jŏ bōła ciekawŏ, co na to powiy Sławoj. Cila zastawiyła go na placu i zadała pŏrã frechownych pytań.

- Panie Sławoj, widzieliście już tyn film ôd mojigo Hajnela?
- Miałem inne zajęcia, byle czego nie oglądam.
- Wasze psy srajōm ludziōm na trity. Zawdy żeście ô tym wiedzieli, pra?
- Idę do pracy teraz. Proszę mnie tutaj nie atakować i nie prowokować, bo ja taki naiwny nie jestem jak pani myśli.

     Zmanipulowanŏ ôd Cile ôpinia publicznŏ je gyneralnie zgorszōnŏ cołkim zjawiskym. Yno niykerzi prōbujōm brōnić bohatyrōw filmu. Gōdajōm, że przeca nic takigo sie niy stało, dyć niy yno psy ôd Sławoja srajōm. I majōm recht, bo tak po prŏwdzie to sie dzieje wszyndy, a nojwiyncyj to srajōm psy ôd elwrōw i mulŏrzy.

     Baba ôd Hajnela posłała tyż link do filmu na adres mailowy spōłdzielnie mieszkaniowyj. Co uzdŏ zarzōnd? Wyciepnōm tego borŏka Sławoja z roboty abo znojdōm mu stanowisko dyrechtora w inkszym mieście? No chyba, że bydōm go brōnić i pedzōm, iże to wszyjsko je wina ôd tritōw, kere same sie proszōm coby na nie nasrać? A Wy jak myślicie?

Komentarze

Popularne posty z tego bloga

"Szlus ze śpiywaniym"

"Niy bydź ślimŏk!"

"Grajfka do szporowaniŏ"