"Tragedyjŏ w Łŏgewnikach"

     Niystety ôstatni Dziyń Bajtla w Łŏgewnikach zakōńczōł sie tragedyjōm. Niy musiało tak być, ale trza pedzieć, że nawet dziecka w Afryce mieli te świynto szczyńśliwsze aniżeli te w naszyj dzielnicy. Rozchodzi mi sie kōnkretnie ô tych bajtli w Afryce, co prawie pojechali tam na wywczasy do keregoś z egipskich kurortōw. Cołki dziyń mogli spyndzić w basynach, nurkować, robić yntki, sjyżdżać na ruczbanach, co yno chcieli. I nawet ôjcowie ich niy szterowali, bo wtynczŏs prawie leżeli naprane kajś w hotelowym szynku abo na ligynsztulach wele kōmpieliska.

     U nŏs po piyrsze mało kery ôjciec abo matka byli w tyn dziyń ôżarte, beztōż bajtle niy mieli aże tela folgi. Po druge, na Amyndach niy mōmy kōmpieliska, bo dwajścia lŏt nazŏd nojprzōd ôstało zawarte, a potyn zrōwnane z ziymiōm. Po trzecie i nojważniyjsze jedyny szpilplac na Amyndach je zarośniōny choby dżungla. W tyj dżungli żyje roztōmajtŏ dzikŏ gadzina, z czego 99,6 procynta to chrobŏki. A chrobŏki, jak wiycie, majōm fest rade bajtli i z chyńciōm nawiōnzujōm ś niymi bliski kōntakt. Nojbarzij kamratne sōm klyszcze, niystety niy kŏżdy ôjciec poradzi ta jejich sympatyjõ docynić i prōbuje wiynź miyndzy niymi serwać. Skuli tego, piyrszego i drugigo czyrwnia aże ôziymnŏstu łŏgewnickich bajtli miało w lazarytach zabiegi ôdklyszczaniŏ.

     Tōż niy ma sie co dziwować, że dziecka byli tym wszyjskim sfrustrowane, dyć niy taki Dziyń Bajtla bōł jejich marzyniym. Tragedyjŏ, kerŏ sie w tyn dziyń przitrefiyła, była naturalnym nastympstwym tyj frustracyje. We wieczōr pod astōm jednego ze strōmōw na Amyndach pŏrã ôsōb szpacyrujōncych po parku bōło świŏdkami makabrycznego ôdkryciŏ. Znŏdli tam wisieć Świnkã Peppã, kerŏ niystety niy dŏwała już żŏdnych cech życiŏ. Na miyjsce przijechała sanitarka, ale do Peppy bōło już za niyskoro. Policyjŏ kludzi podszukōnek, nale niy bydzie leko ôbsztalować jaki bōł richtig ciōng zdarzyń. Zōuwizōu, do dzisioj niy wiymy eli keryś ściykły bajtel bōł autorym takigo aktu ôkruciyństwa abo Świnka Peppa była takŏ sfrustrowanŏ faktym, że niy umi dać bajtlowi szczyńściŏ i skuli tego sama hangła sie na aście.

     Ludzie w internecie piszōm, że wszyjskimu winowaty je MZZiGK w Bytōmiu, kery gyneralnie smoli Łŏgewniki i mŏ kajś całõ ta dżunglã na Amyndach. W niyôficjalnym kōmyntŏrzu fyrmy usłyszelimy yno, że niy śmiymy wajać, bo zielyń i wszyjske te przerośniynte flance sōm fest przidajne, bo robiōm dlŏ nŏs tlyn. Z inkszych źrōdeł doszły do nŏs informacyje, że MZZiGK mŏ w zŏcy strzodowisko, beztōż niy chce wyżinać tyj trŏwy i tych krzŏkōw przi użyciu maszyn elektrycznych abo spalinowych. Szykujōm za to kupã etatōw dlŏ weganōw, kerzi całõ ta dżunglã ańfach zezrōm. Dziynki tymu ludzie bydōm szczyńsliwi, a strzodowisko niy ucierpi.

Bydymy widzieć jako sie to wszyjsko skōńczy. Mōm nadziejã, co na drugi rok dziecka bydōm sie mogły Dniym Bajtla richtig radować. No i żŏdnych umrzikōw ze strōmōw niy bydymy musieli ściōngać.